Халқ депутатлари Хоразм вилоят кенгаши ва Урганч шаҳар Кенгашларидаги ЎзЛиДеП депутатлик гуруҳларининг навбатдаги йиғилиши ташкил этилди. Унда Ўзбекистон Республикаси Президентининг 2024-йил 30-сентябрдаги “Мактабгача таълим сифати ва самарадорлигини янада ошириш бўйича қўшимча чора-тадбирлар тўғрисида”ги ПФ-152-сонли фармони ижросини таъминлаш мақсадида вилоятда олиб борилаётган ишлар юзасидан мансабдор шахснинг ахбороти тингланди.
Йиғилишда вилоят мактабгача ва мактаб таълими бошқармаси бошлиғининг биринчи ўринбосари  Қаҳрамон Зарипов ҳисоботи эшитилди.
Эшитувда бошқарманинг сўнгги йиллардаги фаолияти сарҳисоб қилиниб, эришилган натижалар ва мавжуд муаммолар муҳокама қилинди. Депутатлар таълим тизимида амалга оширилган ислоҳотлар, мактабгача ва мактаб таълим муассасаларининг моддий-техник базасини мустаҳкамлаш, педагог кадрлар салоҳиятини ошириш ҳамда таълим сифатини яхшилаш бўйича олиб борилган ишлар юзасидан ўз фикрларини билдирди.
Шунингдек, эшитув давомида аҳоли мурожаатлари асосида кўтарилган масалалар ҳам муҳокама қилиниб, келгусидаги режалар белгилаб олинди. Депутатлар таълим тизимини янада ривожлантириш, мактаб ва мактабгача таълим ташкилотлари инфратузилмасини яхшилаш ҳамда болалар таълим-тарбиясини янги босқичга кўтариш бўйича ўз таклифларини билдирди.
Хусусан, ўқитувчиларнинг меҳнат шароитларини яхшилаш ҳамда замонавий педагогик ёндашувларни татбиқ этиш, замонавий ахборот технологияларидан самарали фойдаланиш орқали таълим жараёнининг сифатини ошириш лозимлиги қайд этиб ўтилди.
Эшитув давомида 5-март куни давлатимиз раҳбари раислигида ўтказилган Коррупсияга қарши курашиш миллий кенгаши йиғилиши бўйича белгилаб берган устувор йўналишлари ҳам кенг муҳокама қилинди. Маълумки, таълим тизими коррупсиядан холи бўлиши лозим бўлган энг муҳим соҳалардан биридир. Шу боис, йиғилишда таълим муассасаларида шаффофликни таъминлаш, ноқонуний ҳолатларнинг олдини олиш ва бу борада жамоатчилик назоратини кучайтириш масалаларига алоҳида эътибор қаратилди.
Йиғилиш сўнгида депутатлар томонидан соҳа йўналишлари бўйича фикрлар билдирилди ва мазкур масалалар Халқ депутатлари вилоят Кенгаши сессиясига киритиш бўйича қарор қабул қилинди.